После завершения таинства Крещения и облачения новокрещенного в белые одежды священник начинает читать молитву.
Благословен еси Господи Боже Вседержителю, источниче благих, солнце правды, возсиявый сущим во тьме свет спасения, явлением единороднаго Твоего Сына и Бога нашего: и даровавый нам недостойным блаженное очищение во святей воде, и божественное освящение в животворящем помазании: иже и ныне благоволивый паки родити раба Твоего новопросвещеннаго (или рабу Твою новопросвещенную) водою и Духом, и вольных и невольных грехов оставление тому даровавый. Сам Владыко, Всецарю благоутробне, даруй тому и печать дара святаго и всесильнаго, и покланяемаго Твоего Духа, и причащение святаго Тела и честныя Крове Христа Твоего. Сохрани его в Твоем освящении, утверди в православной вере, избави от лукаваго, и всех начинаний его: и спасительным Твоим страхом в чистоте и правде душу его соблюди, да во всяком деле и слове благоугождаяй Тебе, сын и наследник будет Небеснаго Твоего Царствия.
Возглас: Яко Ты еси Бог наш, Бог еже миловати и спасати, и Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
После молитвы священник помазывает крестившегося святым миром, начертывая образ креста у него на лбу, глазах, ноздрях, устах, ушах, на груди, на руках и на ногах, со словами:
Печать дара Духа Святаго. Аминь.
Затем священник с новокрещенным или, если новокрещенный младенец, то с восприемником, держащим младенца на руках, обходит купель.
Хор: Елицы во Христа крестистеся, / во Христа облекостеся, аллилуиа (трижды)
Диакон: Вонмем.
Прокимен, глас 3
Господь просвещение мое и Спаситель мой, / кого убоюся? Стих: Господь защититель живота моего, от кого устрашуся?
Диакон: Премудрость.
Чтец: К Римлянам послания святого Апостола Павла чтение.
Диакон: Вонмем
Чтец: Братие, елицы во Христа Иисуса крестихомся, в смерть Его крестихомся. Спогребохомся убо Ему крещением в смерть: да якоже воста Христос от мертвых славою Отчею, тако и мы во обновлении жизни ходити начнем. Аще бо сообразни быхом подобию смерти Его, то и воскресению будем. Сие ведяще, яко ветхий наш человек с Ним распятся, да упразднится тело греховное, яко ктому не работати нам греху. Умерый бо оправдися от греха. Аще ли умрохом со Христом, веруем, яко и живи будем с Ним: Ведяще, яко Христос воста от мертвых, ктому уже не умирает, смерть Ему ктому не обладает. Еже бо умре, греху умре единою, а еже живет, Богови живет. Такожде и вы помышляйте себе, мертвым убо быти греху, живым же Богови, о Христе Иисусе, Господе нашем.
Священник: Мир ти.
И чтец: И духови твоему.
Диакон: Премудрость, вонмем.
Чтец: Аллилуиа.
Диакон: Премудрость, прости, услышим святаго Евангелиа.
Священник: Мир всем.
Хор: И духови твоему.
Священник: От Матфеа святаго Евангелиа чтение.
Хор: Слава Тебе, Господи, слава Тебе.
Диакон: Вонмем.
Во время оно, единиинадесять ученицы идоша в Галилею, в гору, аможе повеле им Иисус: И видевше Его, поклонишася Ему: ови же усумнешася. И приступль Иисус рече им, глаголя: дадеся Ми всяка власть на небеси и на земли. Шедше научите вся языки, крестяще их во имя Отца, и Сына, и Святаго Духа, учаще их блюсти вся, елика заповедах вам. И се, Аз с вами есмь во вся дни, до скончания века, аминь.
Ектения
Диакон: Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй (трижды)
Диакон: Еще молимся о Великом Господине и отце нашем Святейшем Патриархе имярек, и о господине нашем преосвященнейшем митрополите (или архиепископе, или епископе, имя), и о всей во Христе братии нашей.
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Еще молимся о милости, жизни, мире, здравии, спасении и оставлении грехов раба Божия (имя), восприемника.
Еще молимся о новопросвещенном рабе Божии (или о новопросвещенной рабе Божией, имя). О еже сохранену быти ему в вере чистаго исповедания, во всяком благочестии же и исполнении заповедей Христовых, во вся дни живота его.
Священник: Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Священник: Слава Тебе, Христе Боже, упование наше, слава Тебе.
Хор: Слава, и ныне: Господи помилуй, трижды. Благослови.
И священник творит отпуст.
Чин омовения святого мира
В древности этот чин совершался через 8 дней после крещения, но в настоящее время совершается сразу после миропомазания.
Диакон: Господу помолимся.
Хор: Господи помилуй.
Священник: Избавление грехов святым Крещением рабу Твоему (рабе Твоей) даровавый и жизнь паки рождения ему (ей) подавый: Сам Владыко Господи, просвещение лица Твоего в сердце его озаряти выну благоволи, щит веры его не наветован от врагов соблюди: нетления одежду, еюже одеяся, нескверну в нем и неблазнену сохрани, нерушиму в нем духовную печать благодатию Твоею соблюдая, милостив емуже и нам бывая, по множеству щедрот Твоих.
Возглас: Яко благословися и прославися, пречестное и великолепое имя Твое, Отца, и Сына, и Святаго Духа, ныне и присно, и во веки веков.
Хор: Аминь.
Молитва вторая
Диакон: Господу помолимся.
Хор: Господи, помилуй.
Священник: Владыко Господи Боже наш, купелию небесное осияние крещаемым подаваяй, паки родивый раба Твоего новопросвещеннаго (или рабу Твою новопросвещенную) водою и Духом, и вольных и невольных грехов оставление тому даровавый, возложи на него руку Твою державную и сохрани его в силе Твоея благости, некрадомо обручение сохрани и сподоби его в жизнь вечную и в Твое благоугождение.
Возглас: Яко Ты еси освящение наше, и Тебе славу возсылаем, Отцу, и Сыну, и Святому Духу, ныне и присно и во веки веков.
Хор: Аминь.
Хор: И духови твоему.
Диакон: Главы ваша Господеви приклоните.
Хор: Тебе Господи.
Священник: Одеявыйся (или одеявшаяся) в Тя, Христа и Бога нашего, Тебе подклони с нами свою главу, егоже сохрани непобедима подвижника пребыти на всуе вражду носящих на него и на ны, Твоим же нетленным венцем даже до конца победители вся покажи.
Возглас: Яко Твое есть, еже миловати и спасати, и Тебе славу возсылаем со безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков.
Хор: Аминь.
И развязывает пояс и пелены младенца и, соединив края их, обмакивает их в чистую воду, и кропит младенца, говоря:
Оправдался еси (или оправдалася еси). Просветился еси. Освятился еси. Омылся еси именем Господа нашего Иисуса Христа и Духом Бога нашего.
И, взяв новую губку отирает лицо его, голову, грудь и прочее со словами:
Крестился еси (или крестилася еси). Просветился еси. Мvропомазался еси. Освятился еси. Омылся еси: во имя Отца, и Сына, и Святаго Духа, аминь.
Молитва на пострижение волос
Диакон: Господу помолимся.
Хор: Господи, помилуй.
Священник: Владыко Господи Боже наш, иже образом Твоим почтивый человека, от души словесныя и тела благолепнаго устроивый его, яко да тело служит словесной души: главу убо на высочайших положивый, и в ней множайшия чувств водрузивый, незапинающия друг другу: власы же главу покрыл еси, во еже не вреждатися преложеньми воздушными, и вся уды его потребно насадивый, да всеми благодарит Тя Изряднохудожника. Сам Владыко сосудом избрания Твоего Павлом Апостолом заповедавый нам, вся в славу Твою творити пришедшаго раба Твоего (или пришедшия рабы Твоея) имярек, начаток сотворити стрищи власы главы своея, благослови вкупе с его восприемником: и даждь им всем поучатися в законе Твоем, и благоугодная Тебе деяти.
Возглас: Яко милостив и человеколюбец Бог еси, и Тебе славу возсылаем Отцу, и Сыну, и Святому Духу, ныне и присно, и во веки веков.
Хор: Аминь.
Священник: Мир всем.
Хор: И духови твоему.
Диакон: Главы ваша Господеви приклоните.
Хор: Тебе Господи.
Священник произносит следующую молитву:
Господи Боже наш, от исполнения купельнаго Твоею благостию освятивый в Тя верующия, благослови настоящаго младенца, и на главу его благословение Твое да снидет. И якоже благословил еси пророком Самуилом Давида царя, благослови и главу раба Твоего (или рабы Твоея) имярек, рукою мене грешнаго, приходя ему Духом Твоим Святым: яко да преспеваяй возрастом и сединами старости, славу Тебе возслет, и увидит благая Иерусалимова вся дни живота своего.
Возглас: Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.
Хор: Аминь.
И постригает его крестообразно со словами:
Постригается раб Божий (или раба Божия) (имя), во имя Отца и Сына и Святого Духа.
Хор: Аминь.
Затем произносится ектения сугубая, в которой в своем месте поминается восприемник и новопросвещенный.
Диакон: Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй, трижды (на каждое прошение).
Еще молимся о Великом Господине и отце нашем Святейшем Патриархе имярек, и о господине нашем преосвященнейшем митрополите (или архиепископе, или епископе, имя), и о всей во Христе братии нашей.
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Еще молимся о милости, жизни, мире, здравии и о спасении раба Божия имярек, восприемника и новопросвещеннаго (или о новопросвещенныя) имярек.
Священник: Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Хор: Аминь.
Священник: Слава Тебе, Христе Боже, упование наше, слава Тебе.
Хор: Слава, и ныне: Господи помилуй, трижды. Благослови.
Священник произносит отпуст.
Ссылка на оригинал статьи http://rublev.com/tainstva/miropomazanie/service